СЫГЪЗÆРИН УАСÆГ

Ирон адæмы сфæлдыстады арæх æмбæлы сыгъзæрин уасæг, стæм хатт йæ фарсмæ февзæры сыгъзæрин карк дæр. Фылдæр хатт сын ис мулчы, исбоны, сыгъзæрины нысаниуæг. Æрмæст Даредзанты таурæгъты сыгъзæрин уасæг у архайæг. Сыгъзæрин уасæг хъахъхъæны Тандет-Тундеты буц чызг Тамары. Цалынмæ Амран æмæ Тамар сæ бæхтыл бадтысты, уæдмæ йе 'взаг ныххуыскъ и æмæ йæ уасæн нал уыди. Стæй афтæ тыхджын ныууасыди æмæ Тандет-Тундеты калак иууылдæр сыхъал сты.

Ацы таурæгъы иннæ варианты та Тамары хъахъхъæнынц уæлгоммæ æвæрд къустæ æмæ къæртатæ. Уымæ гæсгæ Тамар Амраны фæдзæхсы, мæсыджы уæлгоммæ æвæрд къустæ æмæ къæртатæ дæлгоммæ æрфæлдах, зæгъгæ. Фæлæ йын дзы иу фæныкæй дзагæй æнæфæлдæхт аззад — нæ йæ бафиппайдта — æмæ мæсыгæй куы æрхызтысты, уæд ныууасыд фæдисы.

кæс «АРВЫ ДУАР»-Ы СÆРГÆНДТÆ